PANITIKANG BAYAN
nais ko palaging magbasa
nitong ating literatura
at matunghayan ko tuwina
ang mga akda ng nauna
mga naunang manunulat
paano ba sila namulat
paano ba sila nagmulat
paano ba sila nagsulat
kaya ginawa ko nang misyon
na inakda nila'y matipon
pambihirang pagkakataon
ang matipon ang mga iyon
at basahin sa libreng oras
na katulad ng panghimagas
tila binasa'y mga pantas
na hangad ay lipunang patas
panitikan mang subersibo
o panitikang makatao
babasahin ko lahat ito
sa mga nauna'y matuto
halina't magbasa ng aklat
ng mga naunang kabalat
sa bansa'y pamana ngang sukat
tanging masasabi'y salamat
- gregoriovbituinjr.
05.26.2024
Walang komento:
Mag-post ng isang Komento