DALAWANG LOLA, NADISGRASYA
dalawang balita sa magkaibang dyaryo
dalawang lola ang namatay, ulat dito
isang lola'y tumawid at nasapul ng trak
nahati ang katawan, sadyang napahamak
isang inang kaytanda na'y patay sa sunog
na tinurong sanhi ay charger na pumutok
mga balitang ang puso mo'y wawakwakin
lalo't tulad nila, tayo'y tumatanda rin
kaya mag-ingat tayo sa ating pagtawid
baka mabagal ang lakad pa't masalabid
mag-ingat din sa pagtsa-charge ng ating selpon
lalo na ngayong kay-init pa ng panahon
mag-ingat, magpalakas, habang tumatanda
parang boyskawt daw, dapat lagi tayong handa
maggulay na't uminom pa ng bitamina
at mag-ingat upang malayo sa disgrasya
- gregoriovbituinjr.
05.06.2024
* mga headline mula sa pahayagang Bulgar at pahayagang Pang-Masa, ika-6 ng Mayo, 2024
Walang komento:
Mag-post ng isang Komento