Mga paalala ni misis

MGA PAALALA NI MISIS

bago mawala si misis ay

kayrami niyang paalala:

"Huwag kang magpupuyat"

"Kumain ng tama sa oras"

"Laging inumin ang vitamins"

"Huwag magpatuyo ng pawis"

"Huwag laging nasa initan"

"Huwag magpagabi"

"Alagaan ang sarili"

"Laging mag-iingat"

bilin niya'y mapagmahal

na nais kong sundin naman

at lagi kong tatandaan

maraming salamat, mahal

sa munti mong paalala

lagi mo ring tatandaan

lagi ka sa puso't diwa

at mahal na mahal kita

- gregoriovbituinjr.

06.17.2025

Gawaing pagsasalin

GAWAING PAGSASALIN

nang maiburol si ama 

noong nakaraang taon

may gawaing pagsasalin

ako noong tinatapos

nang ibinurol si misis

na namatay din sa sakit

may gawaing pagsasalin

ako ngayong tinatapos

nitong Marso'y inilunsad

ang aklat kong isinalin

ilang taong nakaraan

ay tatlong aklat pambata

magmula sa wikang Ingles

ay isasa-Filipino

maging tapat sa pagsalin

at maunawaan ito

pagsasalin ay trabaho

kong pinagkakakitaan

trabaho'y tuloy, panahon

man ng pagdadalamhati

may deadline, nais tapusin

kahit nasa burol man din

isang gawaing niyakap

ng buong puso't layunin

- gregoriovbituinjr.

06.17.2025

Kay Libay, mula sa Kamalaysayan

KAY LIBAY, MULA SA KAMALAYSAYAN

naging bahagi rin si Libay ng Kamalaysayan

o Kaisahan sa Kamalayan sa Kasaysayan

bilang treasurer habang ako'y sekretaryo naman

noon pa, bago pa kami ikasal nang tuluyan

ang namayapang ama'y historyador kaya siya

ay nag-training sa NCCA para sa historya

o kasaysayan ng sariling pamayanan nila

sa Mountain Province, isulat ang kanilang kultura

habang sa akin ay Katipunan at Bonifacio

ang mga sulating makasaysayan ng Supremo

mga akda ni Gat Andres at Emilio Jacinto

pati Kartilya ng Katipunan ay sinaulo

pinapangarap naming ang bayan ay may liberty

mula sa mga pagsasamantala't pang-aapi

ngunit wala na, wala na ang aming si Liberty

alay ay dasal "From Your Kamalaysayan Family"

- gregoriovbituinjr.

06.16.2025

* ang litrato ay kuha mula sa ibinigay ni kasamang Dado Sta. Ana kay Greg sa panahon ng pagdadalamhati

* NCCA - National Commission on Culture and the Arts

Dad, Happy Father's Day po in Heaven

DAD, HAPPY FATHER'S DAY PO IN HEAVEN

Dad, Happy Father's Day po in Heaven

Thanks po sa ginawa n'yo sa amin

noong kayo pa po'y nabubuhay

upang kami'y lumaking matibay

aming edukasyon ay tiniyak

at pinalaki kaming marangal

natuto sa mga pangaral mo

na tindigan ang aming prinsipyo

sa gulang mong walumpu't dalawa

nang sa ospital ay pumanaw ka

mahigit isang taon na ngayon

nang sa piling, mawala ka noon

maraming maraming salamat, Dad

at kami'y pinalaking matatag

ngayon, ginugunita ka namin

Dad, Happy Father's Day po in Heaven

- gregoriovbituinjr.

06.15.2025

* litrato mula sa google

Huling sulyap sa pasilyo

HULING SULYAP SA PASILYO

iyon na ang huli kong sulyap sa pasilyo

ng ospital kung saan ginamot si misis

di na kami babalik sa lugar na ito

di na babalik, pagkat wala na si misis

apatnapu't siyam na araw noong una

siyang madala rito, nakaraang taon

at pitumpung araw naman sa ikalawa

hanggang mamatay ang sinisinta paglaon

matapos ang tatlong araw doon sa morgue

ay nailabas na rin ang labi ni Libay

dahil mayroong promissory note na kami

upang kautangan ay mabayarang tunay

pasasalamat sa mga doktor subalit

ayokong balikan ang ospital na iyon

sa pasilyo'y huling sulyap na iyong pilit

na isang alaala na lang ng kahapon

- gregoriovbituinjr.

06.15.2025

Ang Team Bituin

 

ANG TEAM BITUIN

paborito niya ang numero sais

lalo't birthday niya ay Enero Sais

ang akin naman ay numero nuwebe

na binatay doon sa numerology

kaya may pinatatakang t-shirt siya

habang sa akin naman ay kamiseta

at tinawag niya itong Team Bituin

dahil may teamwork kami pag may gagawin

halimbawa, magtuturo ng ecobrick

sa estudyante, pitong uri ng plastik

pinag-uusapan ang gawaing bahay

magluto, maglaba, paggamit ng wi-fi

sabi ng Team Bituin: "Walang iwanan"

sa pag-ibig man, kalikasan, tahanan

kahit nang siya'y naroon sa ospital

hanggang hininga niya'y doon napigtal

subalit Team Bituin ay di na buo

pagkat buhay ng kabiyak na'y naglaho

isa'y wala na, isa'y tigib ng lumbay

pagsinta'y tanging mananatiling buhay

- gregoriovbituinjr.

06.14.2025

Liberty, 41 pahina ng aklat

LIBERTY, 41 PAHINA NG AKLAT

apatnapu't isang pahina ng aklat

ang haba't ikli ng iyong talambuhay

apatnapu't isang taon ng pagtahak

sa daigdig, samahan, lansangan, tulay

anong sarap basahin ng iyong aklat

na bawat pahina'y may galak na taglay

sa isyung pangkapaligiran ay mulat

na bawat kilos ay batid mong kayhusay

daghang salamat, Libay, sa lahat-lahat

sa bawat pahina mong ligaya'y taglay

ayaw mong maraming basurang nagkalat

layunin mo sa mundo'y talagang lantay

kaybuti mo, wala akong maisumbat

sa pagkawala mo, tigib akong lumbay

mahal ko, taospusong pasasalamat

sa pag-ibig na pinagsaluhang tunay

- gregoriovbituinjr.

06.14.2025

Pag-uwi

PAG-UWI

this week na nakatakda siyang umuwi

hinihintay na lang ang isked ng discharge

siya pala'y iuuwi, di uuwi

pagkat wala nang buhay ang minamahal

ang nagagawa ko na lang ay humikbi

habang hanap ay pambayad sa ospital

kumikilos na lang nang di ko mawari

malayo'y tinatanaw, natitigagal

sangsugal ang buhay, di basta magwagi

tulad ng paligsahan ng mahuhusay

bawat pagtaya'y pagbabakasakali

paglukso ng alamang, malamang patay

planong siya'y iuwi sa lalawigan

katabi ng kapatid, ama, at ina

iuuwi siya sa huling hantungan

upang doon dalawin ng gabi't umaga

- gregoriovbituinjr.

06.13.2025 (Biyernes Trese)

Panimdim

PANIMDIM

kaysakit sa dibdib, di siya maiburol

pagkat di pa buo ang bayad sa ospital

sa ganito nilang sistema, ako'y tutol

dalawang araw sa morgue, ganyan katagal 

sana ospital aming mapakiusapan

kamag-anak, kaibigan na'y nagpaikot

upang makaambag sa pagkakagastusan

habang nahaharap sa panibagong gusot

ang mga nangyayari'y talagang kaysaklap

ay, maninikluhod na ako sa kanila!

promissory note ay ginawa naming ganap

dalawampu't anim na doktor mapapirma

tila nakabitin pa rin kami sa ere

sana may paraang agad magawa kami

- gregoriovbituinjr.

06.13.2025 ng madaling araw

Ang huling selfie namin ni misis

ANG HULING SELFIE NAMIN NI MISIS

tanghali ng Hunyo a-nuwebe

nang kami ni misis ay nag-selfie

at nagkakatuwaan pa kami

iyon na pala ang huling selfie

gabi ay nagsusuka na siya

madaling araw, di humihinga

mga doktor ay nabahala na

at sa I.C.U. siya dinala

habang kaming sa kanya'y nagbantay

ay nagsiuwi muna sa bahay

Hunyo a-onse nang tinawagan

ako ng doktor sa kanyang lagay

siya na pala'y sini-C.P.R.

subalit tanghali, nalagutan

siya ng hininga, nawala na

ay, nawala na siyang tuluyan

gunita na lang ang huling selfie

namin noong Hunyo a-nuwebe 

bagamat selfie nami'y kayrami

iyon na ang aming huling selfie

kaytindi na ng pinagdaanan

ni misis dahil sa karamdaman

sabi nga namin, walang iwanan

at di ko pa masabing "paalam"

- gregoriovbituinjr.

06.12.2025

* litratong kuha sa ospital

Luha ko'y di matutuyo, aking mahal

LUHA KO'Y DI MATUTUYO, AKING MAHAL

Liberty, kayganda ng iyong pangalan

na ang ibig sabihin ay kasarinlan

kalayaan laban sa mga gahaman

at mga mapagsamantala sa bayan

O, Liberty, minamahal kong asawa

sumumpang tayong dalawa'y magsasama

nang habambuhay, bubuo ng pamilya

ngunit ngayon, wala ka na, aking sinta

nasa aking puso't diwa kitang lagi

ang paglalambing mo, anong gandang ngiti

pag-ibig mong sa puso ko'y naghahari

"I love you" ang sa atin ay namutawi

pampitumpung araw natin sa ospital

nang mawala ka, buhay mo'y di nagtagal

tanging pabaon sa iyo'y pagmamahal

habang itong katawan ko'y nangangatal

walang iwanan itong ating panata

ikaw na musa ng panitik ko't diwa 

hanggang dulo, ikaw ang tangi kong mutya

magpahinga ka na, mahal kong diwata

luha ko'y di matutuyo, aking mahal 

ay, di matutuyo, bagkus magtatagal

sa diwa't puso ko ika'y nakakintal

ikaw ang aking buhay at minamahal

- gregoriovbituinjr.

06.11.2025